مسار الفرونت اند front end -ما هو الفرونت اند | عائلة التكنولوجيا

 

طريقة استهداف  الاغنياء علي فيسبوك - كيف تستهدف الطبقة الغنية علي فيسبوك - عائلة التكنولوجيا  زي ما بنقول دايما : التسويق نقدر نختصره في كلمتين " الاستهداف + الإقناع", الاستهداف إن حضرتك تعرف خصائص العميل بتاعك Persona وبعدها تقدر توفق بين الخصائص دي وبين الاستهداف الموجود على منصات التواصل الإجتماعي اللي هتعمل الإعلان عليها وأبرزها الفيس بوك.

أحيانا بتكون حضرتك عارف خصائص عميلك المحتمل بس مش عارف توصل للخصائص دي إزاي لما بتعمل حملة على الفيس بوك, واحد من الامثلة الشائعة على المشكلة دي هي استهداف الطبقة الأغنى ماديا Class A , مثلا حضرتك بتبع منتجات مرتفعة الثمن أو منتجات مصنوعة يدويا أو غيرها من المنتجات اللي غالبا الفئة المستريحة ماديا بس اللي هتهتم بيها, فهنا ممكن تواجهه مشكلة: "أوصلهم الإعلان إزاي؟",

علشان كده هنتكلم النهارده عن أشهر طرق  استهداف الأغنياء على الفيس بوك.

1- المكان

الأغنياء حاليا بيتكتلوا في أماكن معينة بعيدا عن الناس الي زيي وزي حضرتك, وبالتالي ممكن تستهدف الفئة دي لما تظبط إعدادات الحملة على أماكن زي: القاهرة الجديدة والمعادي والساحل الشمالي وهكذا, وممكن تستخدم دبوس الخريطة علشان تحدد أماكن محددة .

2- الهواتف المحمولة

تقدر من خلال إعدادات الحملة إنك تستهدف الأشخاص اللي معاهم أحدث هواتف محمولة زي مثلا: ابل ايفون 12 برو ماكس , ابل ايفون XS Max , سامسونج جالاكسي S21 , ....إلخ

سؤال..أنا أصلا موبايلي بينطق بالعافية فهعرف منين أنواع الموبايلات الفخيمة دي؟

أدخل على قسم الهواتف المحمولة على أمازون أو نون او جوميا, واعمل فلتر بالسعر 10000 فأكتر , هتظهرلك كل أنواع الموبايلات اللي تمنها أكتر من المبلغ ده.

3- الجمهور المشابهة

لو حضرتك عندك موقع (أو صفحة فيس) بتعرض عليك المنتجات دي, غالبا اللي دخل واتفرج عليها هما الطبقة المهتمة فعليا بيها وبالتالي تقدر تطلب من الفيس بوك انه يستهدف جمهور له نفس خصائص جمهور صفحتك أو موقعك lookalike audience , وبيظهرلك ساعتها اختيار select audience size فلو سمحت حاول تقللها على قدر ما تقدر خليها مثلا 1% او 2% , لأن كل لما بتزودها الفيس بوك بيوسع معايير التشابهه وبالتالي إعلانك ممكن يوصل لناس مش مستهدفة.

4- الوظائف

عادة فيه بعض الوظائف بيكون اللي بيشغلوها أصحاب دخل مادي مرتفع , زي مثلا CEO أو Founder أو business ownerوهكذا, فحاول تستهدفهم وشوف اقتراحات فيس بوك عليك إيه هتلاقي فيها حاجات كويسة إن شاء الله.

5- المسافرين للخارج باستمرار

برضه غالبا الناس اللي بتسافر كتير بتكون ماديا مستريحة, أكيد القاعدة دي مش دقيقة 100% لكن صحيحة لدرجة ما تخليني احطها في الاعتبار, وبالتالي ممكن استهدف الـ Frequent international travelers لو ببيع منتجات مرتفعة الثمن.

6- المهتمين بالمنتجات الفاخرة

ممكن نوصل للفئة الأعلى دخلا لو استهدفنا اهتماماتهم, مثلا الجولف, التنس , ماركات السيارات الفارهة زي أودي وبورش ومرسيدس ..إلخ, المطاعم وسلاسل الفنادق العالمية زي ماريوت وهيلتون وفور سيزون..إلخ, ماركات الملابس والبرفانات والساعات الفاخرة زي نايكي ورولكس وأرميني...إلخ.

7- أنظمة التشغيل

إعمل استهداف للناس اللي عندها اجهزة بتتشتغل بنظام التشغيل Mac OS X , لأن دول معاهم منتجات أبل اللي هيا بتكون غالية أصلا .

8- المشترين أونلاين

ممكن تختار حاجة زي الـ Engaged Shoppers خاصة لو دمجتها مع خاصية تانية من اللي اتكلمنا عنهم يبقى كده هتزود إحتمالية استهداف الناس المستريحة ماديا واللي هما كمان بيتشروا أونلاين .

ملاحظات:

- كل طرق الاستهداف دي بتقربك من جمهورك لكن أكيد هي مش دقيقة بنسبة 100% لكن ممكن تعلي مدى دقتها لو عملت قائمة استبعاد , بحيث تستبعد بعض الفئات, ناخد مثال:

إنت هتستهدف سكان المعادي مثلا, أكيد فيهم عمال محدودين الدخل, وبوابين , وبياعين, وهكذا, الفئات دي مش هما جمهورك المستهدف, فممكن تعمل قائمة لاستبعاد الناس اللي شايله موبايلات قديمة أو اللي عايشين في مكان إيجار, او اللي شغال سواق أو عامل , وهكذا..., يبقى كأنك هتصفي الاستهداف العام بتاعك وفقا للمكان علشان تخرج منه الطبقات اللي غالبا مش مهتمة بمنتجك.

- حاول تدمج بين أكتر من طريقة للاستهداف, وخد وقتك علشان تطلع قائمة دقيقة واحفظ قائمة الجمهور ده بحيث تستخدمها باستمرار في أي وقت تحتاجها مش تقعد تعملها من الصفر ومن وقت للتاني طور عليها

- فيه اختيارات تانية إحنا ماجبناش سيرتها لانها مش موجودة في مصر فلو حضرتك بره مصر في أمريكا مثلا فعندك حاجات أدق.

منقوول وقلت افيد بيه حبايبى هنا من المقالات القيمه اللى حافظها عندى واستفدت منها شخصيا